HITZALDIA: "Euskaraz berdintasunean bizi. Hizkuntza eskubideak Euskal Herrian."

 Sasiburuko kideok, Hizkuntz Eskubideen Behatokiarekin batera, hitzaldi interesgarri bat antolatu dugu: "Euskaraz berdintasunean bizi. Hizkuntza eskubideak Euskal Herrian."

- Zer dira hizkuntza eskubideak?
- Egun dugun lege-babesa nahikoa al da?
- Ahalduntzerako tresnak eta erronkak.

"Euskaraz berdintasunean bizi. Hizkuntza eskubideak Euskal Herrian."

Otsailak 9, osteguna

19:00etan

Clara Campoamor kultur etxean

Animatu eta parte hartu!

PINTXO DASTAKETA SAN BIZENTEKO JAIETAN

San Bizenteko jaietan laster murgilduko gara, SORGINA TXIRULINAren ikuskizunaz gain, SASIBURU ELKARTEkook azken urteotan legez pintxo dastaketa antolatu dugu BERBALAGUNekoen laguntzaz.

ZER: PINTXO DASTAKETA.

NOIZ: URTARRILAK-27, OSTIRALA, ARRATSALDEKO 19:00EAN.

NON: KUKUTZ LOKALEAN, MARTXOAREN 8KO PLAZAN.

                  

                              ANIMA ZAITEZ ETA ERDU!!

            

SORGINA TXIRULINA. EUSKAL MITOLOGIA

 SASIBURU elkartekook umeentzako beste jarduera dibertigarri bat antolatu dugu SAN BIZENTEko jaietan.

         SORGINA TXIRULINA. EUSKAL MITOLOGIA JIRA ETA BIRA.

Kantu kontari formatu txikiko ikuskizuna da, non ipuinak eta musika uztartzen diren. 3 eta 10 urte arteko neska-mutilei zuzendutako ekimen honek,musika eta ipuinak bitarteko direla, entzuteko gaitasuna garatzea du helburu nagusi.

NOIZ:  URTARRILAREN 24an, ASTEARTEAN,  ARRATSALDEKO 17:30ean.

NON: CLARA CAMPOAMOR KULTUR ETXEAN.

Barakaldarron hizkuntza eskubideak kinka larrian daudelako elkartu gara

Argazkia: Arkaitz Buron

Gaur, iragarritako elkarretaratzea burutu dugu eta arrakastatsua izan da. 300 pertsona batu gara Barakaldoko hainbat elkarte, erakunde eta norbanako bilduz Barakaldarron hizkuntza eskubideen alde eta justizia eskatuz. Hona hemen irakurri dugun adierazpena:

Barakaldarron hizkuntza eskubideen aldeko elkarretaratzea

Arratsalde on guztioi,

Barakaldarron hizkuntza eskubideak kinka larrian daudelako elkartu gara hemen.

Gertatutakoaren berri emango dizuegu: Barakaldoko udalak 2021ean kultur zerbitzuak kudeatzeko lehiaketa publikoa egin zuen, 4,6 milioi eurokoa. Baldintza gisa ezarri zuen langile guztiek gutxieneko euskara maila jakin bat egiaztatzea.

CCOO sindikatuak lehiaketaren aurka egin zuen, besteak beste argudiatuta hizkuntza betebehar horiek ez datozela bat Barakaldoko errealitate linguistikoarekin.

Ondorioz, epaiketa bat egin eta EAEko Auzitegi Nagusiak CCOO sindikatuari arrazoia eman zion, eta Barakaldoko udalak ez du helegiterik aurkeztuko epai horren aurrean.

Horrenbestez, Barakaldoko 26.000 euskalduni hizkuntza eskubideak urratzen zaizkigu eta ebazpen horrek urraketa hau betikotzea dakar. Are gehiago, honelako injustiziak herri gehiagotan errepikatzen lagun lezake.

Egoera hau biziki larria iruditzen zaigunez, gaur hemen kontzentratu gara.

Hala eta guztiz ere, argitu nahi dugu langileen lan eskubideen alde gaudela, eta euskara ikasteko baliabide egokiak eta behar dituzten erraztasunak izatea eskatzen dugula, beraien jarduera bi hizkuntza ofizialetan burutzeko aukera izan dezaten. Ez dugu nahi euskara langileen eskubideak murrizteko aitzakia bezala erabilia izaterik, baina, ostera, eskubide horien defentsak ez ditzala euskara eta gure eskubideak gutxietsi edo baztertu.

 

Jakin badakigu gai baten inguruan horrenbeste iritzi dagoenean zaila dela irtenbide egokiena topatzea, baina guztion interesak asebetetzen dituzten erabakiak eta konpromisoak adostu behar dira. 30 urte luzeren ondoren agintariek gaiari seriotasunez eta bitartekoekin heldu behar diotela irmoki uste dugu. Herritarrok gure lana egiteko gaude, batzuetan erabakiak txalotzeko eta besteetan salatzeko. Gu, euskaldunon elkarte garen heinean, euskara eta euskal kultura herrira barreiatzeko dinamikan arituko gara eta euskaldunon eskubideak defendatuko ditugu, horretarako gure esku dauden bitarteko guztiak erabiliz.

Gure aldarria argia da: zerbitzu publiko guztietan euskarazko arreta bermatuta izatea eskatzen dugu, legeak ezartzen duen bezala.

 

Sortu den egoera honek argi erakusten du bidea luzea dela, baina, aldi berean, orain dela 30 urte baino laburragoa. Oztopo nabarmenak daude bidean baina denok batera aurrera egitea lortu dugu. Orain lan txukuna egiteko garaia da, oztopoak gainditzen jarraitzeko unea. Saihestu ditzagun bidezidorrak. Gure ustez, afera honetan eragile bakoitzaren hausnarketa egiteko unea heldu da eta hainbeste erabiltzen den ADOSTASUNA hitzetatik ekintzetara igaro behar da EUSKARAZ GURE HERRIAN BIZI NAHI DUGUNON ESKUBIDEAK BERMA DITZATEN, ez bakarrik komunikatuetan, baizik eta egunerokotasunean. Horretarako, gai honi merezi duen lehentasuna eman eta behar beste baliabide martxan jarri beharko lirateke.

 

Bukatzeko, eskerrak eman nahi diegu bide desberdinetatik elkartasuna erakutsi diguten guztiei. Eta eskerrik beroenak gaur hona gerturatu zareten guztioi. Sasibururen filosofia berdinen arteko elkarrizketan eta elkarlanerako prestutasunean oinarritzen da. Beti aipatu dugu lan xumea egiten dugula, baina inork ez dezala pentsa xume izateagatik ez dugula beteko herriko euskaldunekin adostu dugun konpromisoa: Barakaldon euskaraz bizitzeko baliabide guztiak aktibatzea.

 

Gora Barakaldo euskalduna!

 

Barakaldo, 2023ko urtarrilaren 13a.

 

 

Dena prest!

 🟠Gaur arratsaldeko elkarretaratzerako dena prest dugu. Honelako ehunka esku orri banatuko ditugu. "Barakaldarron hizkuntza eskubideen defentsan. 📢 Justizia denontzat!"
#Barakaldo #Euskara #BarakaldoEuskaraz 

BERTSO AFARIA BARAKALDON + PINTXO TXAPELKETA

Laster San Bizenteko jaiak izango ditugu ostera ere, jai horien baitan hainbat jarduera dibertigarri izango ditugu.

Hasteko, SAN BIZENTEKO JAI BATZORDEAk azken hiru hamarkada legez itzelezko BERTSO AFARIA antolatu du.

BERTSOLARIAK:  NEREA IBARZABAL ETA XABAT GALLETEBEITIA.

Sarrerak dagoeneko salgai ditugu BARAKALDOKO AEK-ko euskaltegian.

                                    ANIMA ZAITEZ!!

                                              PINTXO TXAPELKETA

Bestalde, San Bizente auzoko jaien baitan, Barakaldoko AEK-ko irakasle eta ikasleek Pintxo txapelketa bat egingo dute, urtarrilaren 26an, 10:00etan, AEKn bertan.

Ekintza ikasleei begirakoa bada ere, edonork har dezake parte.  

EMAN IZENA: barakaldo@aek.eus e-postan.

                        94 437 20 87 telefonoan.

Pintxoak hotzak izan behar dira eta euskaltegian bertan prestatu beharko dira.

                   ANIMA ZAITEZ ETA PARTE HARTU!!

BARAKALDARRON HIZKUNTZA ESKUBIDEEN ALDE. JUSTIZIA DENONTZAT!

 

PETTI KANTARIA BARAKALDO ANTZOKIAN

 Noam Chomsky pentsalariak komunikabideek gizartea manipulatzeko erabiltzen dituzten estrategiak identifikatu zituen. Harkaitz Canok hamar estrategia destilatu ditu, poema bihurtuz. Eta Pettik ez ditu kantu bihurtu, gezi baizik, bere ahots eta sen musikalaren bidez.

Petti musikari, abeslari eta gitarrista bikaina da. Nafarroan jaioa (Bera, 1973), gazte-gaztetatik hasi zen musika munduan eta 1999an kaleratu zuen bere lehen diskoa. 

Pettiren musikak nortasun propioa du. Bere erraietatik ateratzen den ahots urratu eta sakon hori, bluesaren arima arnasten duten abestiak, gitarra jotzeko trebetasuna eta eszenatokian duen indar basatia dira bere ezaugarri nagusiak.

Bere azken lana," Manipulazio Estrategiak"  2020an estreinatu zen. 

NOIZ: URTARRILAREN 14an,  20:00ETAN.

NON: BARAKALDO ANTZOKIAN

Argibide gehiago: BARAKALDO ANTZOKIA      

BERRIZ ZENTAURO. IRAKURZALE KLUBA

Irakurle klubekoek oraingo honetan Katixa Agirre idazlearen azken liburua irakurtzeari ekingo diote.Liburu horrek bidaia zoragarri batean murgilduko gaitu, animatu irakurtzera eta gurekin zure sentsazioak eta gogoetak partekatzera!

NON: CLARA CAMPOAMOR KULTUR ETXEAN

NOIZ: URTARRILAREN 10EAN. ARRATSALDEKO 19:30ean

BARAKALDOKO EUSKALDUNON ESKUBIDEAK BABESTEKO BILERA IREKIA

Berriki jazo denaz gure kezka agertu nahi dizuegu (ikusi beheko estekak), izan ere, bereziki larria irizten diogu, eskubide urraketa izateaz aparte, ekar dezakeenari beldur diogulako. Hau da, euskaldunok eskubidez ditugun arreta eskubideak gal ditzakegulako eta, erabaki judiziala denez, aurrekari legal bilaka daitekeelako, zeinak euskararen atzera pausu legal gehiago ahalbidetuko lituzke.

Legearen erabilpen maltzurraren lekuko izan gara, izan ere, langileen eskubideen defentsaren mozorropean euskararen eta euskaldunon aurkako epaia inposatu digutelako. Finean, erabaki horrek bigarren mailako herritar bihurtu gaitu Barakaldoko zerbitzu publikoen aurrean eta are zailago egin du berez zaila dena: Barakaldon euskaraz bizi ahal izatea.

Ustez, legeak bi hizkuntzak koofizialak eta baliokideak direla ezartzen du, baina adibide honek sinesmen horren baliogabetasuna baino ez digu azaleratzen.

Honengatik guztiagatik, zuekin bildu nahi dugu iritziak trukatzeko eta gurekin batera animatzen zareten taldeekin eta norbanakoekin erantzun bateratu bat antolatzeko (adibidez, datorren ostiral arratsaldean elkarretaratze bateratu bat edo adosten duguna). Erantzuna erabakitzeko datorren asteartean 18:30etan Herriko Plazako eszenatokian egingo dugun bilera irekira dei egiten dizuegu.

Elkar aurki ikusiko dugulakoan, ondo segi.

Informazio gehiago:  

https://www.berria.eus/albisteak/222741/barakaldoko-udalak-ez-dio-helegiterik-jarriko-kontraten-euskara-eskakizunen-aurkako-ebazpenari.htm

https://www.berria.eus/paperekoa/1990/008/001/2023-01-05/26000-hiztun-euskaraz-egin-ezinda.htm

 

EUSKALDUNON ESKUBIDEEN ALDEko komunikatua